Музейныя таямніцы… або з гісторыі аднаго прадмета

Добры дзень, паважаныя госці нашай рубрыкі. Мы працягваем адкрываць нашым чытачам музейныя таямніцы.

У фондах нашага музея захоўваецца ўнікальны наперсны крыж, які быў зроблены з лыжкі зняволенымі ў ГУЛАГу для святара Міхаіла Кузменка (1915-1986), каб адпраўляць набажэнствы ў лагерных умовах.

А. Міхаіл быў асуджаны ў 1951 годзе за «контррэвалюцыйную дзейнасць і прапаганду» на 10 гадоў зняволення. У ГУЛАГу, у шахтах і на іншых працах у Інце ён правёў больш за 5 гадоў. Пасля вызвалення служыў у розных храмах Беларусі. У Магілёўскай Барыса-Глебскай царкве служыў з 1958 па 1971 гады, дзе напісаў дысертацыю на ступень кандыдата багаслоў’я «Магілёўская епархія ад яе заснавання да 1918 года». Між іншым, быў добра знаёмы з магілёўскім краязнаўцам Геранімам Філіповічам. Апошнія гады жыцця служыў у Полацкай Свята-Ефрасіньеўскай царкве.

Айцец Міхаіл сябраваў з многімі дзеячамі культуры Беларусі — Рыгорам Шырмай, Віктарам Роўдай, Генадзем Цітовічам, Максімам Танкам.

Гэтую рэліквію — крыж з лагероў айцец Міхаіл захоўваў усё жыццё. А музею крыж перадаў яго сын — кандыдат тэхнічных навук, дацэнт БРУ Ігар Міхайлавіч Кузьменка.

Старшы навуковы супрацоўнік Наталля Прачакова